ಅಧ್ಯಾಯ - ೦೭ [07]

 ಅಧ್ಯಾಯ - ೦೭
श्रीमद्भगवद्गीता
ಶ್ರೀಮದ್ಭಗವದ್ಗೀತಾ
सप्तमोऽध्यायः
ಸಪ್ತಮೊಧ್ಯಾಯಃ
ज्ञानविज्ञानयोगः
ಜ್ಞಾನವಿಜ್ಞಾನಯೊಗಃ

07-01
श्रीभगवानुवाच
मय्यासक्तमनाः पार्थ   योगं युञ्जन्मदाश्रयः ।
असंशयं समग्रं मां   यथा ज्ञास्यसि तच्छृणु ॥ ७-१
ಶ್ರೀ ಭಗವಾನುವಾಚ
ಮಯ್ಯಾಸಕ್ತಮನಾಃ ಪಾರ್ಥ   ಯೋಗಂ ಯುಞ್ಜನ್ಮದಾಶ್ರಯಃ
ಅಸಂಶಯಂ ಸಮಗ್ರಂ ಮಾಂ   ಯಥಾ ಜ್ಞಾಸ್ಯಸಿ ತಚ್ಛೃಣು 7.1
 
07-02
ज्ञानं तेऽहं सविज्ञानम्   इदम् वक्ष्याम्यशेषतः ।
यज्ज्ञात्वा नेह भूयोऽन्यत्   ज्ञातव्यमवशिष्यते ॥ ७-२
ಜ್ಞಾನಂ ತೇಹಂ ಸವಿಜ್ಞಾನಮ್   ಇದಂ ವಕ್ಷ್ಯಾಮ್ಯಶೇಷತಃ
ಯಜ್ ಜ್ಞಾತ್ವಾ ನೇಹ ಭೂಯೋನ್ಯತ್   ಜ್ಞಾತವ್ಯಮವಶಿಷ್ಯತೇ 7.2
 
07-03
मनुष्याणां सहस्रेषु   कश्चिद्यतति सिद्धये ।
यततामपि सिद्धानां    कश्चिन्मां वेत्ति तत्त्वतः ॥ ७-३
ಮನುಷ್ಯಾಣಾಂ ಸಹಸ್ರೇಷು    ಕಶ್ಚಿದ್ಯತತಿ ಸಿದ್ಧಯೇ
ಯತತಾಮಪಿ ಸಿದ್ಧಾನಾಂ    ಕಶ್ಚಿನ್ಮಾಂ ವೇತ್ತಿ ತತ್ತ್ವತಃ 7.3
 
07-04
भूमिरापोऽनलो वायुः   खं मनो बुद्धिरेव च ।
अहङ्कार इतीयं मे   भिन्ना प्रकृतिरष्टधा ॥ ७-४
ಭೂಮಿರಾಪೋನಲೋ ವಾಯುಃ    ಖಂ ಮನೋ ಬುದ್ಧಿರೇವ ಚ
ಅಹಙ್ಕಾರ ಇತೀಯಂ ಮೇ    ಭಿನ್ನಾ ಪ್ರಕೃತಿರಷ್ಟಧಾ 7.4
 
07-05
अपरेयमितस्त्वन्यां   प्रकृतिं विद्धि मे पराम् ।
जीवभूतां महाबाहो   ययेदं धार्यते जगत् ॥ ७-५
ಅಪರೇಯಮಿತಸ್ತ್ವನ್ಯಾಂ    ಪ್ರಕೃತಿಂ ವಿದ್ಧಿ ಮೇ ಪರಾಮ್
ಜೀವಭೂತಾಂ ಮಹಾಬಾಹೋ    ಯಯೇದಂ ಧಾರ್ಯತೇ ಜಗತ್ 7.5
 
07-06
एतद्योनीनि भूतानि   सर्वाणीत्युपधारय ।
अहं कृत्स्नस्य जगतः   प्रभवः प्रलयस्तथा ॥ ७-६
ಏತದ್ಯೋನೀನಿ ಭೂತಾನಿ    ಸರ್ವಾಣೀತ್ಯುಪಧಾರಯ
ಅಹಂ ಕೃತ್ಸ್ನಸ್ಯ ಜಗತಃ    ಪ್ರಭವಃ ಪ್ರಲಯಸ್ತಥಾ 7.6
 
07-07
मत्तः परतरं नान्यत्   किञ्चिदस्ति धनञ्जय ।
मयि सर्वमिदं प्रोतं   सूत्रे मणिगणा इव ॥ ७-७
ಮತ್ತಃ ಪರತರಂ ನಾನ್ಯತ್   ಕಿಞ್ಚಿದಸ್ತಿ ಧನಞ್ಜಯ
ಮಯಿ ಸರ್ವಮಿದಂ ಪ್ರೋತಂ    ಸೂತ್ರೇ ಮಣಿಗಣಾ ಇವ 7.7
 
07-08
रसोऽहमप्सु कौन्तेय   प्रभास्मि शशिसूर्ययोः ।
प्रणवः सर्ववेदेषु   शब्दः खे पौरुषं नृषु ॥ ७-८
ರಸೋಹಮಪ್ಸು ಕೌನ್ತೇಯ    ಪ್ರಭಾಸ್ಮಿ ಶಶಿಸೂರ್ಯಯೋಃ
ಪ್ರಣವಃ ಸರ್ವವೇದೇಷು    ಶಬ್ದಃ ಖೇ ಪೌರುಷಂ ನೃಷು 7.8
 
07-09
पुण्यो गन्धः पृथिव्यां च   तेजश्चास्मि विभावसौ ।
जीवनं सर्वभूतेषु   तपश्चास्मि तपस्विषु ॥ ७-९
ಪುಣ್ಯೋ ಗನ್ಧಃ ಪೃಥಿವ್ಯಾಂ ಚ    ತೇಜಶ್ಚಾಸ್ಮಿ ವಿಭಾವಸೌ
ಜೀವನಂ ಸರ್ವಭೂತೇಷು    ತಪಶ್ಚಾಸ್ಮಿ ತಪಸ್ವಿಷು 7.9
 
07-10
बीजं मां सर्वभूतानां   विद्धि पार्थ सनातनम् ।
बुद्धिर्बुद्धिमतामस्मि   तेजस्तेजस्विनामहम् ॥ ७-१०
ಬೀಜಂ ಮಾಂ ಸರ್ವಭೂತಾನಾಂ    ವಿದ್ಧಿ ಪಾರ್ಥ ಸನಾತನಮ್
ಬುದ್ಧಿರ್ಬುದ್ಧಿಮತಾಮಸ್ಮಿ   ತೇಜಸ್ತೇಜಸ್ವಿನಾಮಹಮ್ 7.10

07-11
बलं बलवतां चाहं   कामरागविवर्जितम् ।
धर्माविरुद्धो भूतेषु   कामोऽस्मि भरतर्षभ ॥ ७-११
ಬಲಂ ಬಲವತಾಂ ಚಾಹಂ    ಕಾಮರಾಗವಿವರ್ಜಿತಮ್
ಧರ್ಮಾವಿರುದ್ಧೋ ಭೂತೇಷು    ಕಾಮೋಸ್ಮಿ ಭರತರ್ಷಭ 7.11
 
07-12
ये चैव सात्त्विका भावाः   राजसास्तामसाश्च ये ।
मत्त एवेति तान्विद्धि   नत्वहं तेषु ते मयि ॥ ७-१२
ಯೇ ಚೈವ ಸಾತ್ತ್ವಿಕಾ ಭಾವಾಃ    ರಾಜಸಾಸ್ತಾಮಸಾಶ್ಚ ಯೇ
ಮತ್ತ ಏವೇತಿ ತಾನ್ವಿದ್ಧಿ    ನತ್ವಹಂ ತೇಷು ತೇ ಮಯಿ 7.12
 
07-13
त्रिभिर्गुणमयैर्भावैः   एभिः सर्वमिदं जगत् ।
मोहितं नाभिजानाति   मामेभ्यः परमव्ययम् ॥ ७-१३
ತ್ರಿಭಿರ್ಗುಣಮಯೈರ್ಭಾವೈಃ   ಏಭಿಃ ಸರ್ವಮಿದಂ ಜಗತ್
ಮೋಹಿತಂ ನಾಭಿಜಾನಾತಿ    ಮಾಮೇಭ್ಯಃ ಪರಮವ್ಯಯಮ್ 7.13
 
07-14
दैवी ह्येषा गुणमयी   मम माया दुरत्यया ।
मामेव ये प्रपद्यन्ते   मायामेतां तरन्ति ते ॥ ७-१४
ದೈವೀ ಹ್ಯೇಷಾ ಗುಣಮಯೀ    ಮಮ ಮಾಯಾ ದುರತ್ಯಯಾ
ಮಾಮೇವ ಯೇ ಪ್ರಪದ್ಯನ್ತೇ    ಮಾಯಾಮೇತಾಂ ತರನ್ತಿ ತೇ 7.14
 
07-15
न मां दुष्कृतिनो मूढाः   प्रपद्यन्ते नराधमाः ।
माययापहृतज्ञानाः   आसुरं भावमाश्रिताः ॥ ७-१५
ನ ಮಾಂ ದುಷ್ಕೃತಿನೋ ಮೂಢಾಃ    ಪ್ರಪದ್ಯನ್ತೇ ನರಾಧಮಾಃ
ಮಾಯಯಾಪಹೃತಜ್ಞಾನಾಃ    ಆಸುರಂ ಭಾವಮಾಶ್ರಿತಾಃ 7.15
 
07-16
चतुर्विधा भजन्ते मां   जनाः सुकृतिनोऽर्जुन ।
आर्तो जिज्ञासुरर्थार्थी   ज्ञानी च भरतर्षभ ॥ ७-१६
ಚತುರ್ವಿಧಾ ಭಜನ್ತೇ ಮಾಂ    ಜನಾಃ ಸುಕೃತಿನೋರ್ಜುನ
ಆರ್ತೋ ಜಿಜ್ಞಾಸುರರ್ಥಾರ್ಥೀ    ಜ್ಞಾನೀ ಚ ಭರತರ್ಷಭ 7.16
 
07-17
तेषां ज्ञानी नित्ययुक्तः   एकभक्तिर्विशिष्यते ।
प्रियो हि ज्ञानिनोऽत्यर्थम्    अहम् स च मम प्रियः ॥ ७-१७
ತೇಷಾಂ ಜ್ಞಾನೀ ನಿತ್ಯಯುಕ್ತಃ    ಏಕಭಕ್ತಿರ್ವಿಶಿಷ್ಯತೇ
ಪ್ರಿಯೋ ಹಿ ಜ್ಞಾನಿನೋತ್ಯರ್ಥಮ್   ಅಹಂ ಸ ಚ ಮಮ ಪ್ರಿಯಃ 7.17
 
07-18
उदाराः सर्व एवैते   ज्ञानी त्वात्मैव मे मतम् ।
आस्थितः स हि युक्तात्मा   मामेवानुत्तमां गतिम् ॥ ७-१८
ಉದಾರಾಃ ಸರ್ವ ಏವೈತೇ    ಜ್ಞಾನೀ ತ್ವಾತ್ಮೈವ ಮೇ ಮತಮ್
ಆಸ್ಥಿತಃ ಸ ಹಿ ಯುಕ್ತಾತ್ಮಾ    ಮಾಮೇವಾನುತ್ತಮಾಂ ಗತಿಮ್ 7.18
 
07-19
बहूनां जन्मनामन्ते   ज्ञानवान्मां प्रपद्यते ।
वासुदेवः सर्वमिति   स महात्मा सुदुर्लभः ॥ ७-१९
ಬಹೂನಾಂ ಜನ್ಮನಾಮನ್ತೇ    ಜ್ಞಾನವಾನ್ಮಾಂ ಪ್ರಪದ್ಯತೇ
ವಾಸುದೇವಃ ಸರ್ವಮಿತಿ    ಸ ಮಹಾತ್ಮಾ ಸುದುರ್ಲಭಃ 7.19
 
07-20
कामैस्तैस्तैर्हृतज्ञानाः   प्रपद्यन्तेऽन्यदेवताः ।
तं तं नियममास्थाय   प्रकृत्या नियताः स्वया ॥ ७-२०
ಕಾಮೈಸ್ತೈಸ್ತೈರ್ಹೃತಜ್ಞಾನಾಃ    ಪ್ರಪದ್ಯನ್ತೇನ್ಯದೇವತಾಃ
ತಂ ತಂ ನಿಯಮಮಾಸ್ಥಾಯ    ಪ್ರಕೃತ್ಯಾ ನಿಯತಾಃ ಸ್ವಯಾ 7.20
 
07-21
यो यो यां यां तनुं भक्तः   श्रद्धयार्चितुमिच्छति ।
तस्य तस्याचलां श्रद्धां   तामेव विदधाम्यहम् ॥ ७-२१
ಯೋ ಯೋ ಯಾಂ ಯಾಂ ತನುಂ ಭಕ್ತಃ    ಶ್ರದ್ಧಯಾರ್ಚಿತುಮಿಚ್ಛತಿ
ತಸ್ಯ ತಸ್ಯಾಚಲಾಂ ಶ್ರದ್ಧಾಂ    ತಾಮೇವ ವಿದಧಾಮ್ಯಹಮ್ 7.21
 
07-22
स तया श्रद्धया युक्तः   तस्याराधनमीहते ।
लभते च ततः कामान्    मयैव विहितान् हि तान् ॥ ७-२२
ಸ ತಯಾ ಶ್ರದ್ಧಯಾ ಯುಕ್ತಃ   ತಸ್ಯಾರಾಧನಮೀಹತೇ
ಲಭತೇ ಚ ತತಃ ಕಾಮಾನ್   ಮಯೈವ ವಿಹಿತಾನ್ ಹಿ ತಾನ್ 7.22
 
07-23
अन्तवत्तु फलं तेषां   तद्भवत्यल्पमेधसाम् ।
देवान्देवयजो यान्ति   मद्भक्ता यान्ति मामपि ॥ ७-२३
ಅನ್ತವತ್ತು ಫಲಂ ತೇಷಾಂ    ತದ್ಭವತ್ಯಲ್ಪಮೇಧಸಾಮ್
ದೇವಾನ್ದೇವಯಜೋ ಯಾನ್ತಿ    ಮದ್ಭಕ್ತಾ ಯಾನ್ತಿ ಮಾಮಪಿ 7.23
 
07-24
अव्यक्तं व्यक्तिमापन्नं   मन्यन्ते मामबुद्धयः ।
परं भावमजानन्तः  ममाव्ययमनुत्तमम् ॥ ७-२४
ಅವ್ಯಕ್ತಂ ವ್ಯಕ್ತಿಮಾಪನ್ನಂ    ಮನ್ಯನ್ತೇ ಮಾಮಬುದ್ಧಯಃ
ಪರಂ ಭಾವಮಜಾನನ್ತಃ    ಮಮಾವ್ಯಯಮನುತ್ತಮಮ್ 7.24
 
07-25
नाहं प्रकाशः सर्वस्य   योगमायासमावृतः ।
मूढोऽयं नाभिजानाति   लोको मामजमव्ययम् ॥ ७-२५
ನಾಹಂ ಪ್ರಕಾಶಃ ಸರ್ವಸ್ಯ    ಯೋಗಮಾಯಾಸಮಾವೃತಃ
ಮೂಢೋಯಂ ನಾಭಿಜಾನಾತಿ    ಲೋಕೋ ಮಾಮಜಮವ್ಯಯಮ್ 7.25

07-26
वेदाहं समतीतानि   वर्तमानानि चार्जुन ।
भविष्याणि च भूतानि   मां तु वेद न कश्चन ॥ ७-२६
ವೇದಾಹಂ ಸಮತೀತಾನಿ    ವರ್ತಮಾನಾನಿ ಚಾರ್ಜುನ
ಭವಿಷ್ಯಾಣಿ ಚ ಭೂತಾನಿ    ಮಾಂ ತು ವೇದ ನ ಕಶ್ಚನ 7.26
 
07-27
इच्छाद्वेषसमुत्थेन   द्वन्द्वमोहेन भारत ।
सर्वभूतानि संमोहं   सर्गे यान्ति परन्तप ॥ ७-२७
ಇಚ್ಛಾದ್ವೇಷಸಮುತ್ಥೇನ    ದ್ವನ್ದ್ವಮೋಹೇನ ಭಾರತ
ಸರ್ವಭೂತಾನಿ ಸಂಮೋಹಂ    ಸರ್ಗೇ ಯಾನ್ತಿ ಪರನ್ತಪ 7.27
 
07-28
येषां त्वन्तगतं पापं   जनानां पुण्यकर्मणाम् ।
ते द्वन्द्वमोहनिर्मुक्ताः   भजन्ते मां दृढव्रताः ॥ ७-२ ८
ಯೇಷಾಂ ತ್ವನ್ತಗತಂ ಪಾಪಂ    ಜನಾನಾಂ ಪುಣ್ಯಕರ್ಮಣಾಮ್
ತೇ ದ್ವನ್ದ್ವಮೋಹನಿರ್ಮುಕ್ತಾಃ    ಭಜನ್ತೇ ಮಾಂ ದೃಢವ್ರತಾಃ 7.28
 
07-29
जरामरणमोक्षाय   मामाश्रित्य यतन्ति ये ।
ते ब्रह्म तद्विदुः कृत्स्नम्   अध्यात्मं कर्म चाखिलम् ॥ ७-२ ९
ಜರಾಮರಣಮೋಕ್ಷಾಯ    ಮಾಮಾಶ್ರಿತ್ಯ ಯತನ್ತಿ ಯೇ
ತೇ ಬ್ರಹ್ಮ ತದ್ವಿದುಃ ಕೃತ್ಸ್ನಮ್   ಅಧ್ಯಾತ್ಮಂ ಕರ್ಮ ಚಾಖಿಲಮ್ 7.29
 
07-30
साधिभूताधिदैवं मां   साधियज्ञं च ये विदुः ।
प्रयाणकालेऽपि च मां   ते विदुर्युक्तचेतसः ॥ ७-३०
ಸಾಧಿಭೂತಾಧಿದೈವಂ ಮಾಂ    ಸಾಧಿಯಜ್ಞಂ ಚ ಯೇ ವಿದುಃ
ಪ್ರಯಾಣಕಾಲೇಪಿ ಚ ಮಾಂ    ತೇ ವಿದುರ್ಯುಕ್ತಚೇತಸಃ 7.30
 
 
ॐ तत्सदिति श्रीमद्भगवद्गीतासूपनिषत्सु ब्रह्मविद्यायां योगशास्त्रे
श्रीकृष्णार्जुनसंवादे ज्ञानविज्ञानयोगो नाम सप्तमोऽध्यायः
ಓಂ ತತ್ಸದಿತಿ ಶ್ರೀಮದ್ಭಗವದ್ಗೀತಾಸು ಉಪನಿಷತ್ಸು ಬ್ರಹ್ಮವಿದ್ಯಾಯಾಂ ಯೋಗಶಾಸ್ತ್ರೇ
ಶ್ರೀಕ್ರಷ್ಣರ್ಜುನ ಸಂವಾದೆ ಜ್ಞಾನವಿಜ್ಞಾನ ಯೊಗೊ ನಾಮ ಸಪ್ತಮೊಧ್ಯಾಯಹಃ